قلبي طفل (كتابات عامية)1997

قلبي طفل .. ومهاده أشواق وحنين
وحبي سهل .. نغمات من لحن حزين
يا مرضعة قلبي
قولي لي اشذنبي
مو كل من يصرخ .. يلقى له ملبي

يا صانعة قوتي
ما همني موتي
غيري يحيى بصوته .. وانا انتهي بصوتي
عشقي نسى الحكوة
راوي بلا مروة
هاوي عشق كفٍ
تصنع له ما يهوى

اسمي بناه الود
فارع لفوق يمد
ما ينقهر مهما
يد الظلام تهد

ليلي ونس خاطر
خاطر ورا خاطر
كأنه قوافل موج
وانا سيفه الناطر

يومي باسم يومه
هي رزقة مقسومة
ياتيني بالالوان
وعايم على عومه

حلمي على قدي
فيه ابيض ووردي
بس المهم .. احلم
باللي يكون عندي

بوساكت
1997

ليل الوطن مرسى
نغفى على حسه
ترعانا احضانه
ليما تشق شمسه

واحنا انتغنى يا وطن
بسمك على مر الزمن
وكل اللي قدمته لنا
لا ما يتقدر بثمن

بوساكت
مارس 2001

عمر يبدي بغروب (كتابات عامية)1994

كانت هذه محاولة تخاطب مع شعلة السماء الالهية .. عبر كتابة نبطية لم اعتد عليها او اسعى اليها.. كانت كما كانت .. اذكر تفاصيل تلك الليلة بكل دقة والغريب انها مضت ككل الليالي



يا ونس ليلي .. علامك بالخفا
مستكنٍ .. في سما عليا محجوب
يا طرف حاني .. تعكّف وانكفى
مرتسم فوق السحاب اللي يجوب
انتزع غطوة .. تعكر هالصفا
وبيّن فنونك .. لكل داني كذوب
كم من دور .. ودور .. ثم حفا
وما لقى غيرك .. ينور هالدروب
يا سقى الضامي .. يا صوت الدفا
يا نديم الوجد .. خمّاد الشبوب
انثر انوارك .. عسى فيها شفا
لنزيف القلب .. الدامي الصبوب
يا حلا صورة .. تصور لي وفا
ما لقيته في بشر من كل صوب
علم العاشق .. اذا خله .. جفا
لا يدور في هوى خله طبوب
علمه ان الهوى .. ما ينصفه
وان بغى عزه .. لزوم انه يتوب
يا بدر .. ليت الهوى مني .. اكتفى
ليتني مثلك .. عمر يبدي بغروب
يا وشم عزي .. البها منك صفه
وصورة اوصافك خلت منها العيوب

بوساكت
1994

اكبر من النسيان (كتابات عامية)2001

في رحلة الانسان
في عمره اللي كان
يثبت له بالبرهان
ان الوطن تاريخ
اكبر من النسيان

في ساعة وسط الفي
بعد الفجر .. بشوي
تلقى عظيم الشي
عطر الشواطي يفوح .. ويسبح الرحمن

بوساكت
مارس 2001

دنيا المطر (كتابات فصحى)1999

لا تغالي في احتراف الكبرياء
واغتنم في عيني أحلام المساء
استبق حلمي .. وحقق لي المنى
انتصاري في انعتاق الضعفاء
سق جنوني إلى دنيا المطر
قيد الآلام .. قيدها بماء
دمعك الأنقى .. وأبقى منزلا
فأنت دوما .. كنت نبعا للنقاء
حسبي إذا ما الدمع أرخى عزمه
في عيون الناس يأتي بانحناء
غير أني لم أجد هذا عليك
إنما يطغى على العين ارتقاء

بوساكت
1999

مكتفي (كتابات عامية)2003

ماله معنى .. يا حياتي
كل كلامك ما يفيد
وصارت الكلمة ف شفاتي
انسى .. وبنسى أكيد
كافي يا حبيبي روح
قلبي مكتفي الجروح
يعني انت .. عشت عمري اللي انا عشته
ولا شفت .. اللي بحياتي انا شفته
ما في داعي .. ذا وداعي
وهذا آخر قرار
ما تفيدك .. أي مساعي
واعتبر .. من اللي صار
كافي يا حبيبي روح
قلبي مكتفي الجروح
كنت اعاني .. وانت شايف شللي جاني
واي كلمة .. من كلامك والمعاني
ما تأثر فيني حشى
لا دموعك والصور
وصدق ان اللي مشى
شخص ثاني من البشر

بوساكت
2003

خلص الكلام .. وضاق فيني الشرح
اتعبتني كلمتي .. وملت اهي هالطرح
مرة بهدا
ومرة بتعب
ساعة برضا
وساعة بغضب
مدري جرح النفس انت
ولا انت نفس الجرح

بوساكت
2002

صدقني (كتابات عامية)2002

على شاني .. ارحمني منك
وعذبني .. على شاني
انا اللي ودي .. بس .. لو انك
تصير مره .. اناني
لك روحك .. لو تفكر كيف .. تسعدها
تلقى روحي .. تسعد وتسعد .. بعدها
صدقني .. خذ مني .. عذبني .. على شاني
اسمعني .. افهمني .. ارحمني .. لا تعاني
ما يعيب القلب .. ضعفه
ولينه .. هو ترى المكسب
مو مهم نحب .. صدقني
صدقني .. المهم ننحب

بوساكت
2002

اذا فرحان بعيونك
ليش فيها النظر يرهب
خلني اخيب ظنونك
ولكن لا .. لا تستغرب
تبين عينك فنونك
وتكشف لي .. شكثر تكذب

بوساكت
2000

راجع قصتي (كتابات عامية)2001

الا يا صاحبي وهّل .. انا شللي بديني
كلما احسب لك الحسبة .. تضيعها
على هونك تمهل .. وخاف الله فيني
عنا روحي .. المحبة .. من تشبعها
ظنك انا استاهل .. كلما تشوفه عيني
وكذبه .. يا اسف .. لليوم اتبعها
ودي لحظة تتأمل .. ما بينك وبيني
تصور قصتي وياك .. راجعها


بوساكت
2001

استمع لي (كتابات عامية)1993

استمع لي .. عطني المجال استمع لي
استمع لي .. دام المحال .. لو تغفرلي
مثلما انت من البداية
خلك سخي حتى النهاية .. واستمع لي

ما نسيت .. ولايمكن انسى مهما كان
لما غادرت المكان
مانسيت .. كيف انسى وانا من الالم
اصبح يطاردني الندم
ولو وصل .. صوتي لك او ما وصل
ولو حصل .. اللي حصل او ما حصل
ما عاد ينفعني الندم .. وادري بحكايتنا عدم
وما انت راجع لي .. استمع لي

انا مجبور .. والله مجبور
اعاني بصوتي .. ودمعي مستور
واليوم مجبور
اصور لك عناي .. ووحشة الدنيا وشقاي
لما الحياه دونك تكون .. انهار غادر حضنها الماي
ولو انت عني بتلتهي .. شوقي لك ما ينتهي
لانك انت لي عيون .. تعرف شحب وششتهي
ولو وصل .. صوتي لك او ما وصل
ولو حصل .. اللي حصل او ما حصل
ما عاد ينفعني الندم .. وادري بحكايتنا عدم
وما انت راجع لي .. استمع لي

بوساكت
1993

من سيبقى (كتابات فصحى)؟؟

يا عراة .. فوق بركان الخطر
يا جناة .. ليس للظلم مفر
من سيبقى
عندما تبلى الدروس
وتوارى .. خلف أكوام النفوس

بوساكت

جيتها (كتابات عامية)1994

جيتها .. محبوبة القلب الحزين
جيتها .. وعيوني يمليها الحنين
احمل لها .. شوقي لها
ولهف الجوارح كلها
محبوبتي .. محبوبة القلب الحزين
كلي لها .. اقولها وبكل يقين

ناظرتني واسترجعت كل الصور
وبعيونها سطوة حزن .. ترمي عبر
وتذكرت صوتي اللي فارق سمعها
وغربتي اللي جرحت يوم دمعها
محبوبتي .. محبوبة القلب الحزين
ناظرت وبعينها نفس الحنين

مدي الايادي .. اشفي عنادي
وانا دفا ايدك مرادي
ليت السؤال .. بيني وبينك له بداية
وينتفي بك .. حزن انكتب لي فالنهاية
محبوبتي .. محبوبة القلب الحزين
مدت وشافت واحتفت بالاخرين

بوساكت
1994